اشک ہوں آہ ہوں آتش ہوں کہ اخگر دیکھو غزل || Urdu Best Poetry

 

اشک ہوں آہ ہوں آتش ہوں کہ اخگر دیکھو 

کیا ہوں میں دوستو آؤ مجھے چھو کر دیکھو 

سوچ کے غار سے اک شور اٹھا ہے تو سہی 

اب کہاں جا کے ٹھہرتا ہے یہ لشکر دیکھو 

میں نے مانا کہ گگن پھول کی کشتی ہے مگر 

اپنی دھرتی پہ بھی کچھ دور تو چل کر دیکھو 

میں نے جو سنگ اچھالا وہی سورج نکلا 

ڈوبتی رت کے دہکتے ہوئے تیور دیکھو 

دل کہ دیپک تھا کبھی آج ہے داغوں کا کھنڈر 

کتنے رنگ اور دکھاتا ہے مقدر دیکھو 

گل سے خوشبو ہی اگر روٹھ گئی ہو اطہرؔ 

پھر تو بس ایک مہکتا ہوا پتھر دیکھو