سنگ دل یوں بھی محبت کا صلہ دیتے ہیں غزل || Urdu Best Poetry

 

سنگ دل یوں بھی محبت کا صلہ دیتے ہیں 

بھول کر عہد وفا رنج وفا دیتے ہیں 

اپنے دیوانے کو کیا خوب سزا دیتے ہیں 

دل کے ہر گوشے میں طوفان اٹھا دیتے ہیں 

مدتیں گزریں ادھر سے کوئی گزرا ہی نہیں 

روز ہم شمع جلاتے ہیں بجھا دیتے ہیں 

چال میں رقص نسیم سحری کے انداز 

بات کرتے ہیں تو غنچوں کو کھلا دیتے ہیں 

ایک ہی کام محبت میں ہے دیوانوں کا 

تم سلامت رہو بس یہ ہی صدا دیتے ہیں 

موت اس کی ہے حیات اس کی ہے دنیا اس کی 

جس کو جینے کا سلیقہ وہ سکھا دیتے ہیں 

ان سے اے دردؔ تغافل کی شکایت کیا ہے 

جو ہر اک بات کا افسانہ بنا دیتے ہیں